அறிமுகம்

கைகுலுக்கி
பெயர் சொல்லி
புதிதாய் அறிமுகமாகிற
எவரின் பெயரும்
உடனே நினைவில்
பதிவதில்லை எனக்கு.

சந்திப்பின் முடிவில்
மன்னிக்கச் சொல்லி
மறுபடி பெயர் கேட்டு
மனதில் பதிப்பேன்.

நீ எனக்கு
அறிமுகமானதும்
அப்படித்தன்.

அதன்பின்
புதுப்படம் பார்த்து - அதை
பிய்த்து அலசிய பொழுதுகள்;

புது நாவல் படித்து
அதற்கு
புது முடிவு தேடிய பொழுதுகள்;

சமூகச் சமுத்திரத்தை
சர்ச்சை வலை போட்டு
சலித்தெடுத்த பொழுதுகள்;

நான் நினைத்ததை நீயும்
நீ நினைத்ததை நானும்

பேச்சிலும்
பார்வையிலும்
அசைவிலும்

உணர்ந்த
உணர்த்திய பொழுதுகள்...

இப்படி
நம் எண்ணங்களின்
அலைவரிசை
ஒன்றெனச்சொல்லிய
அற்புத பொழுதுகளில்

நீ
என்னுள் நுழைந்த
பொழுது எது?